Подготовка

1. Гравот исчистете го од оштетени зрна, измијте го и потопете го во ладна вода преку ноќ, најмалку 8 часа.
2. Исцедете го гравот, ставете го во тенџере со свежа вода и оставете да зоврие. Варете го 10 минути, а потоа истурете ја првата вода.
3. Налејте свежа топла вода колку гравот да биде покриен 3-4 прста, додадете ги ловоровите листови и 3 суви пиперки. Варете на тивок оган околу 60 минути, додека зрната не омекнат, но да не се распаѓаат. Во оваа фаза не солете.
4. Во тава загрејте го маслото и пропржете го ситно сецканиот кромид , додека не омекне и не добие златна боја. Додадете го ситно сецканиот лук и пропржете уште некоја минута.
5. Тргнете ја тавата од оган, додадете ги брашното и црвениот пипер и брзо промешајте, за пиперта да не загори и да не загорчи.
6. Запршката додадете ја во варениот грав, посолете, додадете бибер по вкус, додадете го нането и промешајте. Варете уште 5 минути. Гравот треба да е сочен, со течност малку над зрната.
7. Префрлете го гравот во тавче и одозгора наредете ги преостанатите суви пиперки.
8. Ставете го тавчето во ладна рерна, вклучете ја на 200 степени и печете 40-45 минути, додека течноста не се згусне и одозгора не се фати коричка.
9. Извадете го тавчето, ставете го на дрвена подлога и оставете гравот да одмори 10 минути пред служење.